Sogo超市重開 多個日牌獨家進駐 必買蜂蜜醃薑

崇光超市Freshmart裝修後重開,成間超市即刻光猛曬,仲好行好多。

最吸引的要數店內多個新專櫃,好多都是首次進駐香港的日本食物牌子,如神戶牛肉批專門店的神戶牛肉批、玖子貴的流心蛋魚餅、越前海鮮俱樂部的海鮮煎餅、北海道函館Petite Merveille的芝士蛋糕、黑船長崎蛋糕、Butter Butler的牛油費南雪、杉養蜂園的蜂蜜醃薑片等。

小編最追捧的是杉養蜂園,平時去開日本都會買來做手信,特別是那蜂蜜醃薑片,一小分量沖水飲便可,具辣勁又潤喉,另外仲有蜂蜜軟雪糕,個人就嫌其奶味略重。

神戶牛肉批都好食,酥皮做得好輕又脆,牛肉餡好濃又唔膩,必食!品牌另有蘋果批都好出名。

而Butter Butler的牛油費南雪亦有驚喜,質感有點像小蛋糕,牛油味香濃又唔死甜。

除了這些牌子,超市內亦保留了木高砂屋、源吉兆庵這些牌子,另新增了Dalloyau、iCremeria、華御結、HelFit Deli等。

想坐低食飯,UCC另一品牌Mellow Brown Coffee餐廳可以是新選擇,食勁厚多士、pancake、意粉之餘,仲可以買走精品咖啡。