閨密決裂 5個得罪BFF大忌

最近有報道指前組合Cookie的4位成員感情不如往昔,全因有人覺得被出賣而感到「緣份已盡」,不再是BFF。

其實女人堆好得意,好起上來齊齊沖涼去廁所乜都得,一有是非誤會爭拗,可以即時將所有相關照片刪除兼unfriend,頭也不回般決絕。

咪以為這種事不會發生在自己身上,其實要得罪BFF真係話都無咁易,且隨時開罪了連自己都唔知!

以下呢5樣一定係大忌,唔想失去BFF千祈唔好試!

  1. 爆對方秘密 - 話明秘密,可能真係只得你知佢知,千萬別抱著「佢都未必淨係講畀我聽」、「唔係我講都有第2個人講啦」的心態,隨時中招。
  2. 喜歡上對方的心意對象 - 小編都好明白感情事很難預料同躲避,但凡事都有個天秤,如果你認為相識了幾天的人勝過兩脇插刀的好友(甚至乎明明對方先喜歡上),那就只能講一句沒辦法,你注定BFF會嬲你一世。
  3. 事事孖公仔 - 無錯,有些好朋友係鍾意乜都著埋一set,甚至連成個著衫style、髮型、妝容都要一樣,但其實有好多女仔都唔鍾意,特別是你可能打扮得比對方好看時就會有比較,所以唔該睇睇好友的眉頭眼額,唔好以為著得孖公仔般對方便一定受落。
  4. 永遠要人做聆聽者 - 做得BFF,一定好願意同你分擔,不過都唔好老奉次次要人聽你呻,陪你解憂,適當時候都要停頓下,問問對方近況,或者甚至做返對方的聆聽者。
  5. 乜都judge - 好友同你講男友有第三者後依然選擇復合,可能你會因為戥她不值而破口大罵,說她死蠢,咁都好返去賤男身邊云云...... 其實好多女仔同你呻都只係想得到好友認同或附和,而不是想多個阿媽,況且忠言逆耳,你為她好但她卻未必入耳,甚至覺得你有點過火自以為是呢!所以有些說話還是留在心中吧。

Text: Daphne Wu