【關於揹帶】親身試 5款大熱品牌(下)

(抱歉稿件實在太多、湊女實在太忙,到現在才續下篇,不好意思呢~~)

上次提要:我這個瘋狂阿媽試了共5條揹帶,有超唔好用的Pognac揹帶(第一代)及Combi Magical Compact 4合1功能揹帶,同好好用的Baby Bjorn Carrier One,今次就講埋第4及第5條:Pognac(最新一代No.5)及Todbi揹帶。

先講Pognac No.5。

這是品牌最新一代的揹帶,特點是薄、輕、易用,的確係好薄好輕,洗完勁快乾,夏天用時寶寶唔會很熱,因為質感薄連帶連面有拉鏈可打開外布,夠疏風;兩邊膊頭的揹帶唔會太厚太「亞咋」,揹起來感覺輕盈,整體來講幾好用。

而基本的配件,當然同樣齊全:口水墊3塊+包頭布帶。

不過,它還是輸俾Todbi,而輸的位置在於hipseat!

Pognac的hipseat位係輕,但就偏硬,變相寶寶開始重時,坐上去會使hipseat壓住下腹,行路行得耐時唔係幾舒服(我老公是沒有這方面問題的,而我有些朋友用也不覺有異,可能因為高度不同所致)。Todbi則唔同,它有齊Pognac的好處之餘,hipseat位較軟身(你用手按按便知),點揹都係咁舒服,而它的兩邊揹帶位比Pognac更貼膊頭,再舒服多幾重。

喜歡它的,還有腰間的口袋,是有鈕扣的,放八達通、鎖匙都唔驚跌。

試過咁多款揹帶後,真心,所謂好用揹帶好睇個人,始終每人的身高和受力程度不同,我極極極建議大家帶同寶寶一齊去試,揹耐少少行多幾步,感受整體的重力聚焦在哪點先買。