【產程】7重地獄(上)

38周時很期待孩子出世,都快要分娩時卻痛到後悔了(哈)~
 
=產程詳細分享,慎讀=
 

 
無端端想起要寫產程,全因為身邊碰巧有同事跟好友懷孕了,紛紛走來問我生BB的過程是怎樣。
 
唔…… 先旨聲明,每人體質不同,即便是順產,經歷也可差天共地,有人如去大便般容易(我有幾個朋友完全可以用不費吹灰之力的「痾屎」去形容,亦有人來回地獄又折返人間。我,就是歷經7重地獄的活生生例子。 
 
點樣7重法?簡單講,就是陣痛>穿水>開度數後的陣痛>放尿>吸BB出來>會陰傷口連針>會陰疼痛呢7重。 
 
詳細講的話,真夠我再次發惡夢。(OK啦,你當我唔忍得痛……) 
 
話說1月18日預產期當日早上感到絲絲陣痛,由於驚假宮縮,貿然入院會被趕返家,於是就先去睇私家醫生,確定「真陣痛」兼開始見紅始搭的士入伊利莎伯醫院。 
 

 
好幾次,痛到坐在椅子上,看著眼前這片風景……
 
入到醫院,做完一輪檢查+入院手續,堅陣痛開始來了。當時護士說1度都未開,叫我「等下啦,直到每3分鐘痛一次,每次痛1分鐘先通知我地!」
 
痛痛痛,痛到第2日,陣痛頻率依然唔穩定,但痛的程度開始增加,之後更是痛到爆炸,而且很有便意(明顯是陣痛的一種,千祈咪嘗試用力痾),要手抓著床邊才撐得過去,睡又睡不到,好幾次痛到喊,後悔做乜順產咁大膽,是中途求護士俾我打支止痛針*,才叫休息過3個鐘。 
 

via GIPHY

*我覺得呢支針好work,據知副作用有機會是頭暈、作嘔,護士又會同你講支針對BB呼吸或有少少影響(好似好想你唔打咁),我就覺得有排未生得唔使擔心,而用後只覺得少少暈,卻有助入睡,不錯說,有需要的話準媽媽可以試下,但每支只能維持大概3-4小時,而且護士不會讓你怒打。在大房(待產房)無乜咩減痛方法可用,這個值得試。(基本上有暖墊、fit ball幫助紓緩痛楚,但trust me,無乜用!) 
 

via GIPHY

第二晚凌晨,開始痛到頂唔順,護士來檢查過,話宮頸見軟,但一度都未開,今晚應該未生得住。個下灰到想死,咁痛都未生得,點算?繼續痛,死忍難忍,好想放棄、失控之際(其實可以放棄咩?!),突然有一下好痛好痛,瞬間「卜」一聲,下面流出大量暖和的東西,痛到想尖叫*,即按制叫護士。 
 
*臨生前聽到隔離房有孕婦痛到不停大叫,之後俾護士鬧…… by the way,我覺得很痛時是無辦法有力叫的~
 
終於穿水,旋即被通知執好行裝,準備落產房。當下慘到不得了,下半身已經慘痛難當,痛到連站也站不穩,腳一直在震,還要自己收拾大包小包的,回想起來真不知如何撐過去。 
 
「打電話給你先生吧,叫他到產房B4等。」護士拋下一句,我即手震震地按電話,老公很快便接聽。「生得喇?入產房?」「係……」痛到無力再講,仲要自己執好行裝,慘到無人有,好彩老公醒目。(那些清潔姐姐只會鬧你好帶那麼多東西入院,而且冷眼看你完全唔幫手,這個下次再講,順道提醒你走佬袋要小心執~) 
 

[延伸閱讀:7重地獄(中)]

下回再續啊~