【孕記】大肚會抑鬱 腳腫、腰斷、臉脹 10個想快點卸貨的原因

藝人孫慧雪臨盆在即,於ig透露希望可以快點「卸貨」(生下BB),其實不只是她,包括我以及好多媽媽到足月時都好想快些「卸貨」,因為去到懷孕後期已經好好好辛苦!

如果你明白個種辛苦,那麼應該會覺得這幅emoji圖「說得」很到位。

Stage 1是,一知道懷孕即刻開心到要燒炮竹,之後開始諗買咩衫、用不用剪髮方便打理,緊張有何步驟要做定先......(如搵定私家醫生、到公立醫院排床位等)

Stage 2是,身體不適開始來料,想嘔、頭赤赤、肚皮緊緊...... 仲知周身唔對路,影響心情(本人甚至流啡要1個月長時間「瞓床」休養);然後自己開始榮升皇后地位,全家以自己為先(好好珍惜!)。

Stage 3是,感覺好好多,開始enjoy懷孕的過程,但同時肚子重量開始增加,是時候買對更舒服的鞋喇~~~

Stage 4是,YEAH!!去到尾聲,可以食西瓜、飲腐竹糖水,個人愈來愈放鬆,但同時期待 / 驚唔知幾時穿水....... 然後有日突然陣痛,拿拿林拎埋走佬袋去醫院 / 打畀私家醫生,接下來就經歷大家最害怕又期待的生仔過程喇!!!(自然分娩的媽媽應該更驚豬豬吧?有興趣睇睇我的生仔經歷可以去下面條link)

[延伸閱讀:【產程】7重地獄(上)]

好簡單地說畢整個懷孕心情,但其實到你真實面對時,真的會有很多事情令你情緒低落。

記得自己陀到足月時,肚子已經不斷以半圓形狀向外伸展,之前還合穿的衣服已經變得好窄,難怪人家總是說臨生前一個月肚子會開turbo咁增長!

而我的樣子也起了大變化,幾周前仲好正常…… 

但之後……

腫到呢……

你會突然覺得人生好可怕,個樣同身型竟然可以在幾周內來個360度轉變。

這段期間,亦令我開始明白點解(部分)孕婦會有產前及產後抑鬱…… 

整體而言,除了我的樣子唔算太走樣而值得可喜可賀外,以下10點有時確實令我默默黯然……

1. 臉的2旁像腮脹一樣,仲好容易擠出個雙下巴~

2. 部分身體膚色變黑,特別是腋下,令我完全唔想照鏡!

3. 手指關節痛到沒命,腫了都算,半夜會痛醒,醒來仲會發現手指屈曲著張不開(哭)(所以提提大家,在未怒脹時請記得先脫下婚戒,否則到生BB時有乜依郁要除而除不下時就慘了!)

4. 簡單的一個起床動作都要做好多次,因為腰太痛喇 >口<,同埋個肚太大;

5. 咁大個肚頂住,可以想像我連「烏」低身執o野 + 剪腳甲都成問題…… 有次在港鐵甩鞋帶,個種絕望係....... 所以請大家臨尾不要穿要綁帶的。

6. 膝蓋像個90歲老人家,無力+爆痛 *O*

7. 成日感冒(係囉,我都唔知點解我成日感冒,雖說孕婦抵抗力較弱,但我的媽媽級朋友都話無我咁誇,差不多2星期感冒一次!)

8. 看著別人吃壽司飲清酒而我只能吃意粉……(well,這不是近期的事,只是來到孕期最後階段,seems like咩都食得之際,有些就是不能吃以免前功盡廢的感覺,還是頹頹的……)

9. 好易喊,基本上係螢光幕上見人喊我都會眼濕濕。

10. 胎動到躁底。有時BB真會踢到我發脾氣,因為力度很大,間唔中肚子會被她郁到呈梯形,失控指數爆燈!

再來先我的腳,有說臨生前會怒腫3次,well,我數不到3次,而知已維持這狀態好一陣子!(而真的一生完就消曬腫!)

一腫……每隻腳內藏一顆雞蛋。

二腫,我係近乎行唔到……(知喇,唔好食咁鹹呀嘛,我無食得好鹹呀,ok!)

本身條腿已經唔係幼,當初真係好擔心生完都唔識消。

其實呻呻呻,是不關有沒有心理準備事,而是到身體真的要承受起來時,也蠻難受。

而且希望各位媽媽唔好自欺欺人,覺得自己一定要保持好心境才會生出個性好的BB(或不影響BB的狀態),因為你們也是人,有情緒也需要發洩出來才健康!(不然就真的會有抑鬱啦!)

記得當時不少媽媽說:第時你就會好懷念她在你肚內的日子。

那時候未生,真心唔知,而只想快點完成這個孕期,好好開展新一頁,做回一個「正常人」。

到現在生了,你說我懷念嗎,又不完全是,但覺得能這樣經歷過,而幸福的。

希望各位媽媽孕程順利,有甚麼事也不要屈在心裡,好好跟家人或朋友傾訴吧!

仲有,最壞的都總會過去,懷孕的辛酸最終會成你最美好的回憶。(我曾經覺得這句是廢話,現在不能同意更多。)